مساهمة الهكواتي المسرحية في سهرة الوفاء لتوفيق بكّار

فصلان بالتّونسيّة الفصيحة

تضمّن عرض "تغريدة وفاء" المهدى إلى روح توفيق بكّار، إلى جانب الشهادات الأدبيّة والقصائد والأغاني المبتكرة، فقرتين مسرحيّتين سبق للهكواتي أن قدّمهما بشكل آخر ضمن عرض "حدّث بكّار قلنا... حدّث بكّار قال" على ركح دار الثقافة ابن رشيق في 24 ماي 2014.

بين الحياة والإنسحاب من الحياة، مسافة غياب كان لها تأثير على هذين النّصّين اللذين نشر أصلهما في العدد الخاص من مجلّة "معابر" واللذين ننشرهما على هذه المدوّنة في شكلهما الجديد الذي قُدّما عليه في سهرة السبت 17 جوان 2017 على ركح فضاء الهواء الطّلق بالمكتبة المعلوماتية بأريانة.

فصيّل ما كتبوش توفيق بكّار

           

صحة شريبتكم. سهريتنا الليلة مهداة لروح سافرت لخالقها، فيها نحدّثوكم أطيب حديث في الزّمان الجاري، على مُعلّم دياري. سرّته مقصوصة في تونس المحروسة. تعلّمت على يديه الأجيال كبار وصغار. سهريتنا تغريدة وفاء لمعلّمنا توفيق بكّار.

وفاؤنا لبكّار لاهو تكبير فوق الحجم ولا تأليه، ولاهو مديح بلّوشي يتغنى بخصايل ما كانتشي فيه. بكّار كان خليقة وراس كيف النّاس، إنسان نوّاس بين الحلم بالكمال والتسليم بالحال... حال العجز والنّقصان. وهذاكة علاش ما جيناكمش باش نقولوا راهو بكّار فوق النّقد وإلا راهو ربي هز يده بعد ما خلق بكّار. ولكن جينا نقولو لكم اللي الشعب اللي يحب يكون محترم لازم يبدأ باحترام الفكر وتقدير الكبار. وباللي باش يتقال في توفيق حتى حد لا ينجم ينكر اللي هو كان من أكبر الكبار.

وبكّار ، الله يرحمه وينعمه، يعرف تونس، وتونس تعرف ... تعرف آشكون مبكّر باش ياكل السّفنج لا شقاء ولا تعب. و تعرف آشكون قائم قبل الشّمس باش يبحث في كنوز المعرفة وذخائر الكتب. تعرف آشكون راكب الموجة، في كلّ طرح... رشّام، وفي كل محضر... نبّار، وتعرف آشكون في مكتوبه شيطان أزرق داخل للحضبة بدقّ الحنك وضربان الطّار،

تونس تعرف آشكون ... مسخر حياته يخدم بقلب وربّ، جندي، ما يعرف تعب، سلاحه الفكر وكلمة الحقّ، بيهم يبني ويعلّي المعمار. هذا اللي غرسه فينا توفيق... وهذا علاش ما دم تلامذته وتلامذة تلامذته حيين ما يموتش بكّار.

توفيق بكّار، اسم باش يبقى منحوت هونيّة... اسم وراه ثنيّة... وموش كيف الثّنايا، ثنيّته... طويلة وما كانتش... هو اللّي، من قبل ما يمشيها، نحتها بظوافره. ما تبّع حدّ، سي توفيق. خذا على دمادم الغرب، مرّة من طريقهم المكيّسة، ومرّة على غير طريق. خذا منهم ماعون صنعتهم. أمّا ما حفر بيه كان في تربته هو. وما صنع بيه كان صنيعته هو.

ومعلّم في صنعته، بكّار، لغته العربي شْغُلْ وماعون شغُل. فيها يحرث ويزرع منها وفيها، يحفر يقدّر، يطبّق ينظّر، ينظر يدبّر نثرها وأشعارها. علّمنا نتبّعو الغرزة وطرزها وحكارها. علمنا نفركسو في حواشيها حتّى نلقاو العلّة وبنت العلّة، وما نسلّمو كان ما نجمعو الغلّة.

ووقتها، كانك قاري وفهيم وتعرف تعوم بحارها نبّيني كيفاش النّصوص المتحجّبة تنزع من على وجه القمر خمارها، وتبوح لك بأصنافها ورهوطها وتفرّجك في ما خفى من زينها وخنّارها.

صاحب مشروع ثقافي بكّار. والثّقافة يا إمّا مشروع يا إمّا ما هيّاش. قال المسعدي يرحمه "...مَأْسَاةٌ أَوْ لاَ يَكُونْ...". ومشروع بكّار نبت في البلاد وطرح الغلّة. نبت وما عاد حد يقلّعه. مشروع متكامل حلقة متسلسلة دايرة سايرة :

عرصة العرص فيه، الفكر المتنوّر... أما متأصّل ومتجذّر. الجديد، علمنا بكّار، ما ينجّم يتّبنى كان على ساس غارق من ثروة قديمة.

حجرة السّاس في مشروع بكّار: النّقد - تقول إنت - قراية وما كيفها قراية. بيها ندخلو للقسم ونكشفو الأوراق: أفكار جديدة بنماذج نابعة مِ الذّات موش من أصحاب النّظريّات. كيف يقرأ، يسحرك بكّار. تركز معاه ما تفطن كان في صبعك "خاتم شبّيك لبّيك" ويا عاشق الشّعر شوف الشّعر كيفاش ينبت مِ الشّعر قدّام عينيك، ويا متبّع غرزة القصّة شوف القصّة كيفاش تفتّح زهورها من بين غرز القصّة، نودّك ولا نشهّيك. قصيدة جديدة منوّرة وحكاية بكلام توّة مصوّرة، ومعاني تقول تصاغت اليوم، وعلى عصرها الغابر، كانت من أصلها متطوّرة.

وكانك قاري وفهيم وتعرف فصّ الفصوص، نبّيني أش ثمّة في  غريق نصّ النّصوص. وكيفاش وانت تتبّع في خطاوي المُعلّم، تدخل من باب قصره الموشّي، موش باش هو يضبط لك خطوتك وإنت تمشي، وموش باش تشد جرّته كيف ظلّه متضايق ومتألّم، أما تدخل وإنت عارف كيفاش تشق لروحك بروحك بين الثّنايا ثنيّة. وكيفاش تفركس وحدك ما بين المسالك، حتّى يعرضك مفتاح المفاتح، اللّي يحل لك باب الكنوز من غير ما يطيّحك في المهالك. ويوصّلك في عقاب الرّحلة لبلاد علم العلم، فين تتكشّف من غمزات بكّار ... على فنّ صنعة الفنّ وسرّ صياغة الدّهشة من سبائك الحلم في عزّ النّهار.

وهذا المنهج اللي زرعه بكّار في بلاد الأخيار. وخطوة خطوة يا سادة يا مادة، يرجع علمنا وخبرنا لتونس بلاد الخير والسّعادة، ولاّدة الكبار، مولات العرقوب الأخضر اللي ترابها خصيب وضرعها مدرار. اللي جابت ومازالت تجيب بكّار، وعشرين بكّار... ومن يسير على نهج بكّار  ويخلّف لتونس عشرات من أمثال بكّار. هذاكة علاش، ما ماتش توفيق بكّار. وهذاكة علاش، مهما تعتى الأرياح، ومهما الفلك يدور، تبقى بلادنا تشعشع بالنّور، شامخة بنسائها وبرجالها، زاهرة وعامرة. ولازم يجينا يوم وأهلها يعرفوا كار النّاس اللي على جالها مشاو ومازالوا يمشيوا في الطّريق الواعرة.

(الهكواتي)

فصيل ما كتبوش صالح الخميسي

(يقتحم الهكواتي الرّكح مقاطعا المنشط لطفي الشّابّي)

سامحني لطفي يعيش خويا... وقّف دقيقة... ثمّة حاجة موش عادية قاعدة تاقع.

سيّد جانا من تالي... قال لازم نشارك معاكم... نعمل لكم "فصيّل ما كتبوش عمّك صالح"...

-         آشكون هو صالح – قلت له – القرمادي؟

-         لا – قال لي - بلا قرمادي... تلعب؟ ما عرفتنيش؟

-         سامحني من غير محقرانيّة – قلت له

-         ازّيتشي بلا ريق – قال لي – عمّك صالح الخميسي.

-         آشكون – قلت له؟ الخميسي متاع ...؟

-         إيه - قال لي – متاع "في بودفة شبحته نا"، و "جميع الحروبات وفات"، و...

-         سامحني - قلت له – وبرّة تكون إنت هو... آش مدخّل الخميسي في سهرة وفاء لتوفيق بكّار ؟

-         قال لي وانت آش دخّلك ؟

-         شنوّة آش دخلني؟ يا خويا أهبط يرحم والديك اشكون سيادتك إنت؟

يا وخياني... أنا قلت له آشكونك انت وهو :

-         هيّا اتكّى غادي بلا لعب. جبنا ليكم ستّة قلال باش تطيّزونا من أريانة ضربة وحدة ؟

الشاي لله سيدي عمّار... هيا مسيكم بالرضاء يا جماعة... شفتو هالشّنتي آش عامل في روحه؟

فكّرني يرحم والدينا ووالديكم، هاك اللّيلة بنية. جات تشقّ في الجبّانة طالعة لسيدي بلحسن... قالت لي يا راجل تعدّيني يعيشك أنا خايفة؟

مالا ... هنّيتها يا سيدي... قلت لها لا لا ما تخافش. عليك الأمان والضّمان. شدّيتها من يدّها وبديت نشقّ بيها في القبور..

إيه، إيه... - قلت لها - أنا بيدي كنت نخاف منها الجبّانة....، كيف كنت حي، أمّا توّة هاك تشوف فيّ نحوس فيها ليل مع نهار...

ما نفيق بيها كان، يا مرحوم الوالدين، قالت فيها وووه وعطات على ساقيها... شفتو سيدي بنادم كيف تعمل معاه الخير؟

هيا ما علينا فيها... نرجعو للرسمي. بالحق توفيق بكّار، قالوا توفّى ؟ ثبتتوا أرواحكم مليح يكذبوا عليكم. اسألوني أنا نسكن في الجلّاز ... ريحته ما ثمّاش. لا والله البارح بايت في جبانة سيدي الجبالي هنا في أريانة بحذا جماعة أصحابي. موش موجود. أنا يظهر لي مازال بيناتكم أما... 

أنا آش يهمني يجد عليكم مات والا ما يجدش. أنا قاللوا لي ذكرك بالخير في كتاب. اينعم... صالح الخميسي في كتاب متاع نقد. قلت خليني نشوف...

مالا يا سيدي، كان العمل هكّاك. مشيت للمكتبة... يا مكتباجي عندكشي كتب سي بكّار؟  قال عندي... مشّي لي، قلت له، زويّز "شعريّات" ووحيد"قصصيّات"  فيه البركة. خليني نشوف السّاعة.

مالا يا سيدي مدّهم لي. مدّيت له زوز دورو فضّة وفرنك. قلت له هذاكة اللّي عندي. هزّهم وحطّهم ... "ما قصّرتش معايا" - قال لي. آش نعمل بيهم هاذوما ؟ نبيعهم في الأنتيكة؟

هيّا ما عليناش... حلّيت الكتيّبات نشوف... هاوكة يا مرحوم الوالدين فتّكم بالحديث...

ثمّة واحد ولد أمّه يعرف مليح الدّولاب متاع الثقافة، جاء سكن بحذانا محسوب جديد. قال لي تحب تخش للمزالس متاع الثقافوت وتظهر أستاذ في الجامع الكبير أعمل كيفي.

كيفاش؟ قال ماهو في الكتب متاع الجوامع الكبار ثمّة المتن وثمة الهامش. إيه قلت له نعرف موش لازم تفسّر. مالا، قال لي، تجي للكتاب اللّي يعرضك وتشد تقراه من الأوطى، تحفظ م الهامش اللّي كتب من ربّي، حتى من غير ما تفهم.

شد خاصّة الأسامي، قال لي:

شويّة بارت وشويّة تودوروف مع شويّة دو سوسّور على شويّة ستانيسلافسكي ومايرهولد وبرشت على شويّة اوغوست كونت وغوستاف لي بون... وكان تحبّ تفّحهم الكلّ بطريف ابن خلدون ميسالش... باش تظهر موش متغرب ياسر... وتنجم تزيد كعيبتين مشارقة متاع توّة توّة، تقول انت نازك الملايكة وإلاّ أدونيس وإلاّ حتّى منير بن فرج.

آشكون - قلت له ؟

ولد خالتي، قال لي ، آش يهمك في بوه إنت... أحفظ واترك... اهبط للمزلس - قال لي - وابدأ برلي عليهم توّة تشوف كيفاش تسكّتهم جملة وحدة.

مالا يا سيدي ما نطوّلش عليكم... قلت: برّا نتذكّى كيف الناس... مالا حلّيت كتيّب... وبديت نقرأ في الإحالات من الأوطى، كيف ما قال جاري، وفين نلقى حاجة ما نفهمهاش نطلع نقرأ من وسط الصّفحة لفوق، نولّي نفهم.

بهّتني بكّار هذا... آه والله ... شوفوا يا إمّا جاري متاع الجبّانة كذب عليّ كيف قال لي اللّي كبارات الجامع الكبير تلقى صفحات كتبهم شطرها هوامش وهوامشهم أكثر من شطرها أسامي ما يعرفهم حدّ ... وإلا بكّار متاعكم هذا... اللي ما ثماش ريحته مع الموتى كيف ما قلت لكم، سامحوني فيه... من غير محقرانيّة... ماهوش من هاك الكبارات متاع الجامع الكبير برشة...

لا لا ... تي شوف يا سيدي... تعرف أشنوة؟ على الكتب الثّلاثة اللي شريتهم. آش باش نقل لكم؟ السّاعة أولا ورّق يا اللي تورّق باش تلقى إحالة وإلا زوز. صفحاته بكلّها متكّمة بالكتيبة الفوقانية. آش مخلي لي باش نحفظ، السيد هذا؟

وثانيا، يا مرحوم الوالدين، كيف تلقى كتيبة من الأوطى، ترصّي لك تقرأ في حاجة أخرى جديدة، تقول انت تهبط للأوطى باش تعمل سوايع زايدة على الدّرس الفوقاني.

وثالثا، وهذا راس الفتلة. الأسامي اللّي بيهم الفايدة، يتعدو على صوابع اليدين، خاصّة هاك اللّي يدندنو بالقاوري... شوف يا سيدي... على ثلاثة كتب نلقى كان أربعة مرّات واحد اسمه "جاكوبصون". والبقيّة أربعة كعيبات بكلّهم مذكورين مرّة، مرّة.. تقولش يفرّق عليهم في الحلوى... وتجي تشوف تلقى أغلبهم لا منظّرين، ولا هم يحزنون... هاو شاعر، هاو رسّام، هاو قصّاص... ياسيدي انت لواه؟ برشة منهم سمعت بيهم أنا كيف كنت حي... بودلار، فاليري، دو موسّيه، هوقو، ايلوار، و... اشكون معاهم؟ واحد يقولوا له ميشال فوكو... هذا الساعة، قالوا لي مذرّح، موش قاوري صحيح. قال لك كان يقري مع سي بكّار في تونس... والبقية؟

البقية عرب يا صاحبي...  والله كيف ما نقل لكم... منهم سيدي بن رشيق مولا الصّالة اللي في شارع باريس، وسيدي بو حيّان، وسيدي عبد القاهر الجرجاني، وابن قتيبة، وابن شرف، وابن الأثير... هاذوما الكلّ يا سيدي بن سيدي، سي بكّار ، طلّعهم دمادم في التّنظير أكثر من القورّة. يعجبكمشي؟

والبقيّة كيف العادة... هات يا شعراء بشّار بو نواس الشابّي الجاحظ الهمذاني... وآش يعمل عاد؟ موش يقل لك كيف ما الشّيوخة الصحاح:

"عَنْ فُلاَنٍ عَنْ عِلاّنٍ عَنْ ابْنِ فَلْتَانٍ أَنَّهُ قَالْ: انْظُرْ الصَّفْحَةَ الفُلاَنِيَّةَ مِنْ كِتَابِ فُلاَنٍ الْفُلاَنِيِّ الذِي حَدَّثَ عَنْ عِلاَّنٍ آخَرَ عَنْ فَلْتَانٍ بْنِ فَلْتَانٍ آخَرَ... إِلَخْ إِلَخْ.."، ومخّ الهدرة -يقل لك- خاطي خوك راني ما جبت شيء من عندي"

لا... كيف العادة –يرحم والدينا ووالديك- يشدّ يعطيك عليهم دروس ومعلومات، وإلاّ يجيب لك قصائد أخرى وأخبار غير اللّي يحكي لك عليها في وسط الصّفحة، وهات عاد يا سوايع زايدة مرّة بالعربي ومرّة بالسّوري...

يا خويا آش عليّ فيه أنا ؟ قل لي اتّلهى لوّج فين ذكرك بالخير ونحّي عليك الكلوف...نقل لك، يا سيدي بن سيدي، ماذا بيّ. أمّا ها هو أنا نلوّج وتعرضني شروح توقّف المخّ. الرّاجل طلع شرّاي شبوك م البريمة. والله كيف ما نقل لكم... داخل في الشّيخ اِمْحمّد عبده ويا ما أدراك. مالا اشنوة؟ يا ولدي... شوفو هذه مثلا  قال لك:

"والغضارة - يشرح في المقامة الأرمنية - والغضارة في هذا الموضع من المقامة "النّعيم"، لا القصعة، كما ذهب إلى ذلك الشّيخ الإمام."

بالله ؟ زادم على جماعة الأزهر يا توفيق وليدي؟ واش بيك؟

لا ويزيد شوية ويعاود يلعج عليه: "النّاطق بهذا القول، في النّصّ، هو ناقل حديث عيسى، لا عيسى، كما رأى في شرحه الشّيخ الإمام."

آش باش نقل لكم؟ بالله خلّي واسكت، تي هو روحه ما سلمتش منّه. شفتو هذه؟ قال لك : "نَسَبْنَا الحُكْمَ خَطَأً إِلَى المَعَرِّي ، وَإِنِّي لَأَلْتَمِسُ المَعْذِرَةَ مِنْ رُوحِ أَبِي العَلاَءِ وَمِنَ القُرَّاءْ".

باهي كيف إنت راد عليك ربّي وغلطت، ماهو اعمل كيف جماعة الجامعة الكل... استر ما ستر الله... تي النّاس في دكتوراوات عدّات علينا حنوشة ماهي حنوشة، وطفّات الضوء، جاي إنت...

الله يهدي وبرة...

أمّا ما نكذبش عليكم ثمّة حاجات جاوني ع المضّاغة. ها هو نقرأ لكم شدّ عندك: "ولِأَهْلِ تُونُسَ فِي الأَمْسِ غَيْرِ البَعِيدِ مِنَ الطُّقُوسِ "السّْطَمْبَالِي" (يا بابا يا بابا) هذا نعرفو مليح ونحقّه السّطمبالي... يا حسرة...

وإلاّ قال لك : "اِسْمٌ كَانَتْ تُسَمَّى بِهِ هُنَا فِي تُونُسَ مَسْكُوكَاتُ الذَّهَبِ"، نطلع لفوق نشوف اشنوّة ها الاسم نلقاه يحكي على (المحبوب) هو يقصد فالــ... (معشوق) ههه ويلمح للــ... (حنيّنات) ههه.

وإلاّ هذه: "مَثَلٌ تُونُسِيٌّ يُضْرَبُ لِمَنْ يَسْتَسْلِمُ لِهَدْهَدَةِ النَّوْمِ، وَالدُّنْيَا مِنْ حَوْلِهِ تَسِيرُ حَثِيثًا". آآآآه... في آشكون تقصد يا وليد خويا؟ شطر التّوانسة آآآآآ... ما عليناش...

آش باش نقول لكم: الحقيقة حاشاهم شيوخة الجوامع الكبار. ما شفتش في السّابق آشكون منهم يحكي على الحاجات هذه...

أمّا أنا آش يهمّني فيه؟ هيا ... قريت قريت من الأوطى، وفي الاخر يا سيدي خلطت ليّ أنا... نلقاه يستشهد بي بالحق، وفي غناية من غناياتي تقول "أنا للبيع ياللّي تشريني". أشكون ما يعجبوش اسمه في كتاب؟ أمّا تعرفوا اشنوّة اللي رهوجني ؟ من دون غناياتي الكلّ ما لقى كان وحدة ضاعت من بالي جملة. ما بقى منها في مخّي كان "أنا للبيع ياللّي تشريني، نخدم ونطيع، وكّل واكسيني" وحتّى اللّحن متاعها أرض وكانت له بلاّعة.

عاد هاهو قالوا لي ثمة واحد يقولوا له الهكواتي، يرحم والدينا ووالديه، خذا الطالع هذا وكتب عليه كلمات جديدة وعمل له لحن جديد وغنّاه توة يجي ثلاثة سنين في صالة سيدي بن رشيق. خليني نمشي نفركس عليه وكان لقيته توة نرجع لكم نغنيها لكم. هيا بخاطركم توة . 

 (الهكواتي)